تحذير لمتساكني الكاف / المصابة الجديدة بكورونا لم تغادر الجهة منذ مدّة وأُصيبت بالعدوى من داخل الولاية

توضيح هام فيما يخص الحالة السادسة المريضة بالكورونا في ولاية الكاف على لسان إبنها

" الحكايه بدات الإثنين إلي فات الوالده تعبت شوي و حسست عندها سخانه و بقات على نفس الحاله ليوم الإربعاء مشات للإستعجالي و بقات البرا قالولها كلم 190 كلمهم الوالد دخلوها سألها بعض الأسئلة قاتلو عندي سخانه و وجيعه في جنبها عطاها دواء و قالها تو تيحلك سخانه و روحت ياخي الحله بقات نفسها هزها الوالد لطبيب خاص يوم الجمعه بحكم للإستعجالي قالها معندكش شي وهي سخانه فوق 39 و الوجيعه تقطع فاها سألها الطبيب الخاص عملوش ليك تحليل كورونا قتلو لا ولا عطاها تحاليل باش يفهم شنيا صاير عملتهم قالها عندك إلتهاب زاد عطاها تحاليل أخرين باش إثبت في سلامه الكبد عملتهم و رجعت نهار السبت قالها كبد لباس عملت رديو تبينلو إنو الوالده عندها إلتهاب في الرئه قالها برا لسبيطار يعملولك تحليل كورونا هذي هيه الحكايه.

بالنسبه #للعدوى نأكد إلي هيا #تعدات من #الكاف و حكايت مشات لتونس بحذا ولدها غالطهه أنا من 1 مارس مريتش دارنا و زيد كي بدا الحجر الصحي مبيتش نروح خوفا على عايلتي إني لا قدر الله نهز ليهم المرض أنا مازلت في تونس و الوالده من الكاف المدينه مخرجتش و جاهم حتى حد من خارج الكاف #يعيشكم رودوا بالكم راو مرض موجود في الكاف و كيما تعدات أمي تنجم تتعدا برشا ناس أخرى حالت الوالده مستقره الحمد الله و إنشاء الله بقية أفراد العايله يطلعو لباس و هوما تو في الحجر الصحي الذاتي "

لمتساكني ولاية الكاف، الزموا الحذر وربي يقدّر الخير