نائب الكرامة عبد اللطيف العلوي يكشف رواية جديدة بخصوص البريد الغامض الموجه لقصر قرطاج وبلاغ رئاسة الجمهورية

كتب نائب الكرامة عبد اللطيف العلوي - ايه، معناها في الآخر نحبّوا نفهموا حويجات صغيرة:
تو الجواب موجود ومشى للداخلية ولاّ مزّقته "آلة تمزيق الأوراق"؟!
والسيدة مديرة الديوان عملت تحاليلها في مصحة خاصة كيما قالت لسي محمد عمّار، ولاّ في المستشفى العسكري كيما قال البيان؟!
وعلاش هي اللّي تحلّ في الظّروف أصل؟! هكّه الإجراءات الأمنيّة عندكم؟
باهي، وبخلاف المديرة والموظّف؟! فمّا طرف ثالث رمى الجواب في الآلة ولاّ نڨّز وحده جا في وسطها؟!
وها الشخص اللّي رمى الجواب، لاهي يسعف في المديرة ولاّ أوّل فكرة جاته هي التخلّص مالجواب؟! موش نورمالمون في الحالة هذي أوّل روفلاكس يجي حتّى لعمّار بالزّور هو التّحفّظ على أداة الجريمة؟!
باهي والقصر فيه أطبّاء ولاّ مافيهوش؟، زعمه شافوها وعملولها إسعافات أوّلية ولاّ هوما زادا ما عيّطلهم حد، وخذات تاكسي من غادي لغادي للمستشفى العسكريّ؟!
بااهي، وعلاش سي محمّد عمّار، مواطن "فورست كلاس" يعرف أسرار القصر من عند المديرة مباشرة بشكل حصريّ قبل ما تتشرّف الرّئاسة بنشرها لعموم النّاس؟!
وهل يا ترى جماعة التيار الكل "فورست كلاس"، ولاّ سي محمّد عبّو وسامية عبّو والمخبّش ومحمّد عمّار أكاهو؟!
باااهي يا سيدي، اعتبروني بلعت هذا الكلّ! شنيّه حكاية الفقرة الأخيرة اللّي فيها تنديد ضمنيّ بعمل جهة التّحقيق؟! ياخي من ناحية كتمتم الخبر كي لا تربكوا الدولة وتثيروا البلبلة، ومن ناحية أخرى متغششين كيفاش يتمّ التّحقيق مع من ينشر الخبر بهذه الطريقة ويتسبّب في الإرباك والبلبلة؟!!
حيرة مواطن عايش في بلاد اللّي بالي بالك.