نشرت فتاة تونسية على موقع التواصل الإجتماعي فايسبوك تدوينة تروي فيها تفاصيل تعرّضها لعملية براكاج داخل المترو 2 على مستوى محطة 10 ديسمبر وأكدت أنها تعرّفت على هوية الفاعل وقدمت شكوى لدى مركز الأمن ولكنهم تستروا عليه. وهذه تدوينتها كاملة :
تعرضت لبراكاج في المترو 2 في 10 ديسمبر
انا طلعت وثمة زوز أولاد اصلا متجيبهاش فيهم انهم يسرقوا ويعملوا براكاجات .الزويز هذم انا طلعت وهم طلعوا في جرتي ضاموني حصروني في الميترو .اصلا معادتش باينة وسط العباد واحد فيهم جبد عليا موس في جنبي وقال لي تتكلم ولا تصيح راني ندغرك نذبحك نشلطك ولزلي برشة الموس في جنبي اتصوروا فلم الرعب الي عشته في اللحظة هذيكا حسيت الدنيا الكل ضلامت قدامي متت بالخوف وهو باقي يهدد فيا ولا نجمت نتكلم ولا نتحرك ،هكاكة وصاحبه الي معاه دخل يده في الساك وهزلي تلفوني ومعاه فلوس وفصعوا مع تسكيرة باب الميترو .وقتها انا صحت وقلت راو فكولي تلفوني، ثمة طفل خرج رأسه من شباك الميترو وقله يا هشام رجع تلفون الطفلة يعني يعرفه وولد حكومته من اريانة .بعدها مشيت للمركز في اريانة بش نشكي دخلت عطيت بحثي وعطيتهم صفات السيد الي اسمه هشام ياخي العون قال لي سايي عرفته الي تحكي عليه هذا هشام الزكراوي ولد حومتي ويخدم في البلاصات برج الوزير وعساس هو وخوه.وزاد قلي اتهنئ برى روح ارتاح على روحك وغدوة تجي تلقا تلفونك. زيد بعد ما كملت عطيت بحثي دخل الطفل الي هو بيده "بعد متسكر باب المترو خرج رأسه مالشباك وقال له يا هشام رجع تلفون الطلفة" دخل للعون قال لهم راو هشام الزكراوي ومعاه شكون براكاو الطفلة .
انا حمدالله لباس ونحمد ربي الي مصارلي شي جاتني في تلفون وفلوس ولا في صحتي .اما الي غاضني كونه واحد من المجرمة الى يدعى "#هشام_الزكراوي عرفوه الاعوان واحد من الاعوان قلي راو هشام ولد حومتي إلخ .... وزيد فوق هذا عندي شهود وكل يوم قعدت نمشي ونجي على المركز وهم لا حياة لمن تنادي كل يوم يقولولي ارجع غدوة،
هذه فضيحة كونه يجي رجل أمن يتستر على سارق مجرم خاتره ولد حومته ويطفيوا شكايتي انا . بالرسمي بلاد عالحيط ومكثر الفساد والبراكاجات والسرقة كان من تهاون وتستر الأمن على الأشكال هذه.
0 تعليقات